Christine Boss
www.fahrschuleboss.ch / 079 224 93 17
Bruuche mer im Team e kreativi Idee, de cha d Chrige fasch immer witerhäufe u öppis füre zoubere. Näbscht ihrem Humor het si e sehr warmhärzegi u geduldegi Site. Ihri Freizit verbringt si em liebschte i ihrem Hüsli mit em grosse Rosegarte. Dert gits öppe immer öppis ds fuschte u wenn aus gmacht isch, de klimmperet si no gärn es Lied uf em Klavier. Das nid immer fählerfrei, derfür aber vo Härze.
Claudia von Gunten
www.fahrschule-von-gunten.ch / 079 729 54 46
Üsi Jüngschti im Team isch d Clöide. Egau ob Outo oder Boot, aus wo motoret u lut tönt, fingt si cool u fägig. Mit ihrere ufgsteute u hiufsbereite Art, isch d Clöide im Team e grossi Bericherig fü üs aui. Aus Usglich vom Ungerrichte uf der Strass, flitzt si mit ihrem coole Boot mitts ufe Thunersee u gniesst när i auer Rueh di einzigartige, wunderschöne Sunneungergäng.
Dimitri Hirt
www.fahrschulehirt.ch / 079 225 65 62
Üse Feus ir Brandig isch der Dimi. Mit sire ufgschlossnige u gwüssehafte Art, bhautet är üses Team im Glichgwicht. Bruchte me öppis vo ihm, de isch er jederzit u superschnäu für üs da. Der Dimi brucht sini Ouge nid nume im Strasseverchehr. Si scharf Blick isch o nötig für sini Lieblingsfreizitbeschäftigung. Em meischte Fröid het der Dimi we sini Schüss bim Sportschiesse über 300 Meter mitts i ds Schwarze träffe.
Michael Portner
www.fahrschule-michu.ch / 079 297 98 99
Mit Michu's ungerhautsame Art wärde sogar die trochenschte Sitzige mit fade Theme, zumene luschtige Erläbnis. Sini lockeri, gsellegi aber o ruhegi Art zeigt sech nid nume im Outo, sondern o ufem Boot bi sire grosse Lideschaft, em Fische. Übrigens, a hand vo de Fotos wo mir aube gseh, zablet dert hüfig a grosse Fisch am Haagge.